Crearás robots que se converterán en aliados lendarios na nosa viaxe a través do tempo.

Exploraremos a robótica con ferramentas adaptadas a cada nivel: desde as máis pequenas, que construirán sistemas con LEGO e programarán con bloques en Micro:Bit ou Edison, ata as máis maiores, que usarán Python e se iniciarán en linguaxes máis avanzadas a través de placas como Arduino e robots programables.

Converteremos os drones en ferramentas clave para observar, mapear e resolver desafíos ao longo da nosa viaxe no tempo.

O alumnado traballará con drones programables en obradoiros adaptados a cada nivel. Aprenderán conceptos de mecánica do voo, aerodinámica, electrónica e seguridade, ademais de realizar calibracións, programar rutas mediante código e practicar o pilotaxe real, convertendo cada misión nunha experiencia tecnolóxica completa.

Peza a peza, imaxinan e crean solucións que lles permitirán superar desafíos desde a Prehistoria ata o Futuro.

En deseño 3D, o alumnado máis novo usará Tinkercad e o de maior idade traballará con SketchUp e BlocksCAD para crear modelos cada vez máis complexos. Despois, levarán os seus deseños ao mundo real mediante impresoras 3D e bolígrafos 3D, descubrindo como transformar as súas ideas en obxectos tanxibles.

Empregamos o poder do código para resolver desafíos en cada era e avanzar cara ao futuro.

A programación será o fío condutor de todos os nosos obradoiros, empregando ferramentas como CoSpaces, Makey Makey e Scratch. Ademais, traballaremos a ciberseguridade para que o alumnado aprenda a usar Internet e as redes sociais con responsabilidade, privacidade e seguridade, incorporando tamén o uso da intelixencia artificial de forma práctica, creativa e responsable.

O período de solicitude de prazas será do 18 ao 24 de maio de 2026.

A persoa titora legal deberá completar un cuestionario no que poderá inscribir simultaneamente ata tres irmás/os.

O luns 25 de maio comprobarase que as solicitudes recibidas cumpren os requisitos mínimos de acceso e o martes 26 de maio publicarase nesta web unha listaxe cos datos das inscricións válidas recibidas e o seu número de solicitude (todas as irmás ou irmáns inscritos pola mesma persoa terán un único número de solicitude).

A asignación de prazas para cada turno levarase a cabo do seguinte xeito:

Empregarase o número premiado no sorteo do Cupón Diario da ONCE do mércores 27 de maio.
Dividirase ese número entre o número total de inscricións. Ao resto desa división sumaráselle 1. O resultado desta operación será un número dentro do rango da listaxe de números de solicitude.

O número de solicitude que coincida con ese resultado será a primeira persoa admitida, e as demais asignaranse consecutivamente, mantendo o criterio de que o 80 % das prazas se reservarán para nenas.

Enviarase un correo electrónico ás persoas admitidas inicialmente para que completen a súa inscrición, indicando o procedemento e os prazos. Tamén se informará o alumnado que quede en lista de espera.

A confirmación da praza realizarase mediante o pagamento e a presentación da documentación solicitada dentro das datas establecidas. Unha vez recibido o pagamento, xerarase automaticamente unha factura.

Se a inscrición non se completa no prazo indicado, esta será anulada e a praza asignarase ao alumnado da lista de espera, segundo os criterios de admisión.

Finalmente, enviarase un correo electrónico ás persoas admitidas na listaxe definitiva para confirmar a súa praza, e ás persoas non admitidas notificaráselles a súa non admisión.

Días antes do inicio do campus, a institución formativa porase en contacto coas persoas participantes para informalas dos detalles finais.