A Cátedra convoca a primeira edición do certame Vídeos pola Igualdade, unha iniciativa dirixida a centros educativos de Galicia co obxectivo de promover a igualdade de xénero no ámbito das TIC desde idades temperás.
O concurso está orientado ao alumnado de 1º e 2º da ESO e anima aos equipos participantes a presentar pezas audiovisuais creativas que cuestionen os estereotipos de xénero e visibilicen o papel das mulleres no sector tecnolóxico. Cada centro educativo poderá presentar un ou varios traballos realizados por diferentes grupos de estudantes, sempre que se axusten ás bases da convocatoria.
Os vídeos deberán ser orixinais, cunha duración máxima de 3 minutos, e estar concibidos para a súa difusión en redes sociais. O contido poderá abordar cuestións como a elección de estudos, o acceso á tecnoloxía, o uso responsable das redes sociais ou as expectativas de futuro das mozas, entre outros temas relacionados.
A avaliación dos traballos será realizada por un xurado formado pola dirección da Cátedra ALDABA-WIB, que terá en conta aspectos como a orixinalidade, a calidade da mensaxe, a realización técnica e o enfoque en igualdade e linguaxe inclusiva. O vídeo mellor valorado recibirá un premio de 1.000 euros, destinados á adquisición de libros e/ou material informático.
O prazo de presentación de candidaturas remata o 25 de marzo, e a entrega do premio realizarase nun acto público no centro galardoado, en datas próximas ao Día Internacional das Nenas nas TIC, que se celebra o 23 de abril.
Con esta iniciativa, a Cátedra reforza o seu compromiso coa sensibilización e a promoción de vocacións tecnolóxicas entre as mozas, apostando pola educación como motor de cambio cara a un sector TIC máis diverso e igualitario.
As bases e inscrición están dispoñibles na web da Cátedra (wib.aldaba.es).